حلقة اليوم الأحد 24 / 7
أعزائي مشاهدي Ahly Fans Studio أهلا و مرحبا بكم في الحلقة الأولى من البرنامج الذي نتمنى أن ينال ثقتكم و إعجابكم
بداية سنستضيف في هذه الحلقة العضو " Mimo 10 " حتى نوضح لكم جميعا طريقة عمل البرنامج و كلنا أمل في أن يتقدم الأعضاء ليقبلوا أن نستضيفهم مستقبل في حلقات أخرى
***************************************************************************
Ahly Fans Studio /
سريعا قول لنا رؤيتك للمباراة القادمة بشكل عام الأهلي و الترجي خصوصا بعد اهدار نقطتين بتعادل غريب مع الوداد في استاد الكلية الحربية ؟
Mimo 10
أكيد طبعا مباراة صعبة جدا خصوصا ان الترجي خرج الأهلي من نصف نهائي البطولة نفسها العام الماضي بالإضافة لإن الأهلي فيه حالة من " اللخبطة " بعد الفوز بالدوري و دي وضحت زي ما قلت في مباراة الوداد خصوصا في خط الدفاع و حراسة المرمى .
Ahly Fans Studio
غيابات كتيرة جدا بيعاني منها الأهلي و مؤثرة جدا زي بركات و دومينيك شايف ده هيكون له تأثير ع الأداء ؟
Mimo 10
أكيد طبعا واحد زي بركات غيابه هيأثر بالسلب على أداء الأهلي و دومينيك أثبت نفسه بسرعة و هو لاعب هداف و أعتقد من الأعمدة الأساسية للفريق حاليا انما كلي ثقة في اللعيبة الموجودة خصوصا خط الهجوم بنمتلك فيه أكتر من بديل زي جدو و متعب و تريكة
Ahly Fans Studio
السيد حمدي شايف انه هيكون ليه دور مع الأهلي الفترة الجاية عموما و مباراة الترجي خصوصا ؟
Mimo 10
هو لاعب جيد و ان كنت غير مقتنع بيه انما ان شاء الله مستواه يتطور مع فريق كبير زي الأهلي و نسجم و يضع بصمته سريعا انما في مباراة الترجي أتمنى يكون ليه دور بس أعتقد صعب على لاعب جديد يدخل الأجواء و يتألق في مباراة مهمة زي دي و خارج ملعب فريقه و قدام فريق كبير زي الترجي
Ahly Fans Studio
مستر جوزيه دايما يفاجئنا بتشكيل مختلف و طريقة لعب مختلفة تقدر تحط لنا تصور للطريقة اللي هيفكر بيها الخواجة المباراة الجاية ؟
Mimo 10
معاك حق بس في اعتقادي مباراة كبيرة زي دي مش هتستحمل فلسفة أو تجربة هو هيفكر ازاي يأمن دفاعاته و يرجع الثقة لحراسة المرمى و يعمل دفاعات قوية في نص الملعب و يضيق المساحات على لعيبة الترجي و هيحاول يأمن دفاعه بحيش ما يتفلبش أو ما يدخلش فيه هدف و يعتمد على الهجمات المرتدة السريعة و الكرات الثابتة لخطف نقاط المباراة التلاتة
Ahly Fans Studio
أبو تريكة مستواه عليه علامات استفهام كبيرة بعد الاصابات المتكررة اللي بيتعرض لها ..شايف انه هيبدأ المباراة ولا هيستنى على دكة الاحتياط و ينزل ولا مش هيكون ليه دور خالص ؟
Mimo 10
ابو تريكة في أشد الحاجة للدعم حاليا خصوصا بعد الاصابات اللي أثرت عليه زي ما قلت و ان شاء الله يرجع لمستواه و أعتقد هيقعد بديل لإن جوزيه هيميل للعب بخط وسط مدافع في البداية و ممكن يستعين بيه حسب سير المباراة و عموما أتمنى أبو تريكة يرجع تاني لمستواه و أنا واثق من ده ان شاء الله
Ahly Fans Studio
اتكلمنا عن الأهلي تعالى نشوف الجانب الآخر و هو نادي الترجي الرياضي التونسي بحكم متابعتك شايف الترجي مختلف عن السنة اللي فاتت ولا لا ؟
Mimo 10
أنا مش متابعهم ولا حاجة
بس على حد علمي ان اينرامو مشي راح نادي تركي و على حد علمي برده انهم متصدرين الدوري التونسي أو حصلوا عليه و تأهلوا لنهائي كأس تونس يعني باختصار انت هتلاعب فريق قوي مش يهمني اختلف ولا لا بس اللي يهمني انه فريق عنيد و قوي افريقيا و هتلاعبه على ملعبك اذا المباراة صعبة جدا
Ahly Fans Studio
سمعنا برده عن غيابات كتيرة ي صفوف الترجي شايف ان ده حقيقي ولا أسلوب التمويه اللي اتعودنا عليه من فرق شمال أفريقيا و لو كان حقيقي ممكن تعرفنا الغيابت و مدى تأثيرها ؟
Mimo 10
الله أعلم بس فيه أخبار مؤكدة بتقول ان أسامة الدراجي و يوسف المساكني هيغيبوا عن المبارة دي و ان صحت هذه الأخبار فده هيأثر جدا على الترجي غياب اتنين من أهم لاعيبيتهم لإن الدراجي هو أبو تريكة تونس و المساكني على ما أعتقد لاعب مهم جداا في التشكيل الأساسي لهم انما هرجع و أقول بردع الفرق الكبرى لا تتأثر كثيرا بغياب لاعب أو اتنين مهما كان اسمهم و حجمهم
Ahly Fans Studio
الأجواء في تونس بعد الثورتين شايفها هتبقى مختلفة و أحسن ولا هيبقى فيه نفس الأجواء المتوترة بتاع شمال افريقيا ؟
Mimo 10
متفائل خير مع ان نهائي مونديال العسكري بين مصر و الجزائر أثبت العكس للأسف انما ان شاء الله اخواتنا في تونس يكونوا في عهد جديد زينا و تسود الروح الرياضة الجميلة و تخرج مباراة كرة قدم بين اتنين اخوات الفائز نقول له مبروك و الخسران نقول له هارد لك
Ahly Fans Studio
الاجراءات الأمنية في تونس متخوف منها ؟ خصوصا انهم بيعانوا من حالة انفلات أمني مشابهة للي عندنا و فيه دلائل كتيرة أقربها مباراة الأفريقي التونسي مع الهلال السوداني ؟
Mimo 10
لا ان شاء الله الجماهير التونسية بسلوكها الواعي تغنينا عن كل ده و كلنا ثقة في السلطات التونسية بتأمين بعثة الأهلي و نتمنى المباراة تتلعب في أجواء طبيعية تسودها الروح الرياضية
Ahly Fans Studio
أخيرا توقعك لنتيجة المباراة ؟
Mimo 10
واحد - صفر للأهلي ان شاء الله
Ahly Fans Studio
نتمنى التوفيق للمارد الأحمر في تاني مبارياته في دوري المجموعات في بطولة دوري أبطال أفريقا و حصد النقاط الثلاث باذن الله ليتربع ملك أفريقيا على صدارة مجموعته
شكرا للضيف Mimo 10
شكرا لكم أعزائي المشاهدين على حسن المتابعة
انتظرونا غدا في حلقة جديدة مع ضيف جديد و المزيد من التفاصيل حول مباراة الأهلي و الترجي المقبلة
و السلام عليكم و رحمة الله و بركاته
